Алпинисти банирани од Еверест поради фотошопирано искачување

Вести

Двајца планинари лажирале искачување на Монт Еверест и доставиле фотошопирана слика за да „докажат“ дека го сториле тоа. Но, наместо да освојат награда, измамата им донесе 10-годишна забрана за искачување на која било планина во Непал.

Нарендер Синг Јадав и Сима Рани Госвами од Индија тврделе дека го качиле врвот во 2016 година. Рекле дека биле дел од група од 15 алпинисти и дури доставиле фотографии до Непалскиот оддел за туризам за да го потврдат нивното искачување. Сепак, нешто било сомнително.

Прво, други планинари тврделе дека парот не го качил врвот, а еден од Шерпите го потврдил тоа. Откако внимателно ги испитале доставените слики, искусни планинари забележале неколку грешки: маската со кислород не била поврзана со резервоарот и немало одраз на снег во очилата. Исто така, знамињата на сликата биле млитави, што би било невозможно во областа позната по стравотни ветрови.

Hindustan Times објави една од фотографиите и мислам дека не мора да си мајстор за Фотошоп за да откриеш дека искачувањето е целосно лажирано. По истрагата на владата, било потврдено дека фотографиите се лажни, исто како и искачувањето на Јадав и Госвами. Властите во Непал сега се обидуваат да забранат дуото не само да се искачува на Монт Еверест, туку и на други непалски врвови за 10 години.

Кога ја прочитав приказната, помислив дека ми звучи познато. Да, не е прв пат да се лажира искачување на врв, а верувале или не, има се повеќе луѓе кои го лажираат и искачувањето на Еверест. Според некои истражувања бројот на луѓе што го прават тоа вртоглаво расте, од неколку на деценија, до неколку десетици секоја година.

Која е поентата? Зошто луѓето го прават ова? Дали е тоа популарноста во маало, бустање на егото, 15-те минути слава или Инстаграм лајкови? И сето ова, но и разни други поволности. Во разни земји во светот често им се доделуваат национални награди, национални пензии и сл., на оние кои успеваат да се искачат на највисоката планина во светот. Во Индија пак, ако веќе работат за владата, понекогаш им се даваат и унапредувања и други доживотни придобивки.

Па претпоставувам дека логиката на овие „лажни алпинисти“ е “fake it till you make it”. Но, ако ве фатат, можете да изгубите многу повеќе отколку што сте ќариле.

Претходен написи
Почна традиционалниот планинарски марш во чест на Борис Трајковски
Следен напис
Ски центарот Нижеполе ќе се засилува со новини
Мени