По повеќегодишна дебата, највисоката планина во светот, Монт Еверест, официјално е малку поголема. Монт Еверест се наоѓа на границата на Непал и Кина и се верува дека врвот е највисокото место во светот. Непалските и кинеските власти конечно постигнаа договор дека планината е висока 8.848,86 метри (29.031 стапки). Новото мерење го прави Еверест 86 сантиметри поголем од претходната висина на Непал, и повеќе од четири метри повисоко од претходното мерење на Кина.
Зошто имаше несогласување?
Кинески експерти сметаа дека Монт Еверест треба да се мери само според неговата висина на карпата, но непалските научници сакаа да го вклучат снегот што е на врвот на планината. После големиот земјотрес во 2015 година постоеше теорија дека движењето на делови од Земјината кора, наречени тектонски плочи, може да влијае на нејзината висина, што наведува многумина да веруваат дека треба повторно да се измери. Геодетите од двете земји сега работеа заедно за да се договорат за новата висина откако извршија нови мерења. Договор за заедничко објавување на новата висина беше постигнат откако кинескиот претседател Си Џинпинг минатата година го посети Катманду, главниот град на Непал.
Мерење
Непал испрати свој тим геодети на планината за прв пат во мај 2019 година. Претходно висината што ја имаа запишано беше од индиско истражување во 1954 година. Тимот помина две години обука за мисијата, но условите на врвот се толку сурови што водечкиот геодет го загуби палецот од смрзнатини!
Кинеските геодети го достигнаа врвот во мај оваа година. Тие се единствената екипа што се искачи на врвот оваа година затоа што планината беше затворена за алпинисти поради коронавирусот. Геодетите од двете земји ги користеа истите методи за да направат сопствено мерење на планината, на крајот согласувајќи се за новата поголема висина.
***
За Монт Еверест се смета дека се издига околу 40 см на век (100 години), така што ќе продолжи да станува сè поголем, но многу бавно. На врвот на планината, е многу студено и покриенa e со снег во текот на целата година. Се проценува дека планината е стара 50-60 милиони години и настанала при судир на индиските и евроазиските тектонски плочи.
