Црногорскиот ски центар Колашин 1600 кој се наоѓа на планината Бјеласица ќе добие нови 6 км ски патеки до крајот на годината. Новите скијачки патеки ќе ги исполнат сите стандарди и норми според меѓународната скијачка федерација (FIS). Планирано е да содржат и пропратни елементи категоризации, маркации, патокази, заштитни огради, соодветна сигнализација и ширина од 20на метри. Владата на Црна Гора изминативе 2-3 години инвестираше околу 22 милиони евра за подобрување на туристичките капацитети само на овој ски центар. Минатата година во функција беше ставен и нов шестосед, инсталиран и ставен во функција во најкраток можен рок.
Владата на Црна Гора вложува 100 милиони евра за изградба на нови ски-центри до 2022 година, вклучувајќи комплетна патна и комунална инфраструктура. Само во ски центарот Колашин 1600, ќе бидат инвестирани околу 50 милиони евра. Инаку зоната на Колашин е на висина од 1400 до 1800 метри, неспоредливо помали територијални и висински разлики во однос на нашите од бога дадени падини на Шар Планина со речиси готови патеки без потреба да исечеме ниту едно стебло.
