Паметните учат од туѓите грешки, а останатите од своите. За оние кои штотуку ги започнуваат своите први планинарски патувања, би било добро да бидат информирани за најчестите грешки што ги правеле многумина пред нив, за да не мораат да поминуваат низ истото самите.Во никој случај не се препорачува да одите на вашите први искачувања сами, без поискусен.
Несоодветна облека и обувки – како што досега научија многу странски туристи , не можете да одите на пешачење во папучи. И искусните планинари ќе ви кажат дека не е паметно да носите дури и неразгазени чевли за пешачење, бидејќи постои можност да ви направат плускавци. Облеката исто така треба да се прилагоди на времето, на пример, мерино волнената облека е најдобра и се препорачува затоа што најлесно ја вади влагата од вашето тело надвор, ве остава суви. Многу облека за планинарење е направена од различни материјали, претежно волна или синтетика како ефтина варијанта.
Носење на премногу работи во ранецот – ако ставите премногу непотребни работи по неколку часа рамената и грбот ќе бидат се само не благодарни. Земете го само она што навистина ви е потребно.
Храна и вода – зависно од времето и турата, треба да се снабдите со доволно храна и вода. Пешачењето троши енергија и вода, кои треба да се надоместат за да се избегне замор и дехидрација. Колку храна ќе понесете, зависи и од тоа дали имате и планинарски дом на патот. Дознајте дали ќе има нешто да се јаде таму, планинарите се секогаш гладни.
Заминување сам без друштво – во никој случај не се препорачува да одите сами на први планинарења, без некој поискусен. Без разлика колку кратко трае пешачењето, почетниците лесно се губат. Доволно е само да се изгуби концентрација на неколку минути и да се промаши една маркација. Тоа им се случува и на искусните. И тогаш, во најдобар случај, ве чека непотребно враќање на истиот пат. Покрај тоа, ако случајно се повредите, треба да имате некој со вас да ви помогне. Исто така, вистинските планинари следат некои правила и принципи, сите ќе ги научите во вистинско планинарско друштво.
Игнорирање на временската прогноза – Кога сте во природа, на отворено и без засолниште, временските непогоди добиваат поголема тежина отколку кога ги гледате од удобноста на вашиот дом. Добро информирајте се за временските прилики и подобро откажете го патувањето отколку, на пример, да бидете зафатени од невреме среде патека пример кон Титов Врв.
Преценување на сопствените способности – запрашајте се колку е тежок теренот по кој планирате да пешачите, колку време ќе ви биде потребно за искачување , па проценете дали можете да го направите тоа. Подобро е да ви „фали“ некој километар отколку пријатен ден во природата да се претвори во тортура.
Доцно движење, за еднодневно пешачење, раното заминување понекогаш е многу важно, особено за пократки денови, за да не ве стемни на патот назад. За секој случај, добро е да имате челна лампа со вас, но ако добро го испланирате денот, нема да ви треба. Избегнувајте ноќно движење на планина, лесно може да се изгубите и дезориентирате.
